Atal Pension Yojana details: ಅಟಲ್ ಪೆನ್ಷನ್ ಯೋಜನೆಯಲ್ಲಿ 2025-26ರ ಒಂದೇ ವರ್ಷದಲ್ಲಿ 1.35 ಹೊಸ ಸಬ್ಸ್ಕ್ರೈಬರ್ಸ್ ಬಂದಿದ್ದಾರೆ. ಯಾವುದೇ ವರ್ಷದಲ್ಲಿ ಈ ಸ್ಕೀಮ್ಗೆ ಅತಿಹೆಚ್ಚು ನೊಂದಾವಣಿ ಕಂಡಿದ್ದು ಇದೇ ಮೊದಲು. ಒಟ್ಟು ಸಬ್ಸ್ಕ್ರೈಬರ್ಸ್ ಸಂಖ್ಯೆ 9 ಕೋಟಿ ದಾಟಿದೆ. ಎಪಿವೈ ಸ್ಕೀಮ್ನಲ್ಲಿ ಬಹಳ ಕಡಿಮೆ ಹೂಡಿಕೆಯಲ್ಲಿ ಪಿಂಚಣಿ ಸೌಲಭ್ಯ ಪಡೆಯಬಹುದು.
ಕೇಂದ್ರ ಸರ್ಕಾರದಿಂದ ನಡೆಸಲಾಗುವ ಅಟಲ್ ಪೆನ್ಷನ್ ಯೋಜನೆಗೆ (APY- Atal Pension Yojana) ನೊಂದಾಯಿತರಾದವರ ಸಂಖ್ಯೆ ಏಪ್ರಿಲ್ 21ಕ್ಕೆ 9 ಕೋಟಿ ಗಡಿ ದಾಟಿದೆ. ಅದರಲ್ಲೂ ಒಂದೇ ವರ್ಷದಲ್ಲಿ ಒಂದು ಕೋಟಿಗೂ ಅಧಿಕ ಸಬ್ಸ್ಕ್ರೈಬರ್ಗಳು ಬಂದಿದ್ದಾರೆ. 2025-26ರ ಹಣಕಾಸು ವರ್ಷದಲ್ಲಿ ಎಪಿವೈ ಸ್ಕೀಮ್ಗೆ ನೊಂದಾಯಿಸಿಕೊಂಡವರ ಸಂಖ್ಯೆ ಬರೋಬ್ಬರಿ 1.35 ಕೋಟಿ. 2015ರಲ್ಲಿ ಆರಂಭಗೊಂಡ ಈ ಸ್ಕೀಮ್ನಲ್ಲಿ ಯಾವುದೇ ವರ್ಷದಲ್ಲಿ ಅತಿಹೆಚ್ಚು ಸಬ್ಸ್ಕ್ರೈಬರ್ಗಳು ಸಿಕ್ಕಿದ್ದು ಇದೇ ಮೊದಲು.
ಏನಿದು ಅಟಲ್ ಪೆನ್ಷನ್ ಯೋಜನಾ?
ಅಟಲ್ ಪೆನ್ಷನ್ ಯೋಜನೆಯು ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವವರು, ಬಡವರು ಮೊದಲಾದ ದುರ್ಬಲ ಮಂದಿಯನ್ನು ಗುರಿಯಾಗಿಸಿ ರೂಪಿಸಲಾಗಿರುವ ಪಿಂಚಣಿ ಸ್ಕೀಮ್. ಇದರಲ್ಲಿ ವೃದ್ಧಾಪ್ಯದಲ್ಲಿ 5,000 ರೂವರೆಗೆ ಪಿಂಚಣಿ ದೊರಕುವ ಅವಕಾಶ ಇದೆ. ಬಹಳ ಕಡಿಮೆ ಪ್ರೀಮಿಯಮ್ ಹಣ ಕಟ್ಟಿದರೆ ಸಾಕು.
18 ವರ್ಷದಿಂದ 40 ವರ್ಷದವರೆಗಿನ ವಯೋಮಾನದವರು ಎಪಿಐ ಪೆನ್ಷನ್ ಸ್ಕೀಮ್ಗೆ ಸಬ್ಸ್ಕ್ರೈಬ್ ಆಗಬಹುದು. ಆದರೆ, ಫಲಾನುಭವಿಗಳು ಆದಾಯ ತೆರಿಗೆ ಪಾವತಿದಾರರಾಗಿರುವಂತಿಲ್ಲ.
5,000 ರೂ ಪಿಂಚಣಿ ಪಡೆಯಲು ಎಷ್ಟು ಹೂಡಿಕೆ ಬೇಕು?
ಈ ಯೋಜನೆಯಲ್ಲಿ 60 ವರ್ಷ ವಯಸ್ಸಿನವರೆಗೂ ಹೂಡಿಕೆ ಮಾಡಬಹುದು. ಕನಿಷ್ಠ ಖಾತ್ರಿ ಪಿಂಚಣಿ 1,000 ರೂನಿಂದ 5,000 ರೂವರೆಗೆ ಇದೆ. ಅದಕ್ಕೆ ಅನುಗುಣವಾಗಿ ಪ್ರೀಮಿಯಮ್ ಇರುತ್ತದೆ.
18ನೇ ವಯಸ್ಸಿನಲ್ಲಿ ಸಬ್ಸ್ಕ್ರೈಬ್ ಆದರೆ 42 ವರ್ಷ ಕಾಲ ಹೂಡಿಕೆ ಮಾಡಬಹುದು. ತಿಂಗಳಿಗೆ 42 ರೂನಂತೆ 42 ವರ್ಷ ಹೂಡಿಕೆ ಮಾಡಬಹುದು. 60ರ ವಯಸ್ಸಿನ ನಂತರ 1,000 ರೂಗಳ ಮಾಸಿಕ ಪಿಂಚಣಿ ಸಿಗುತ್ತದೆ. ಈ ಅವಧಿಯಲ್ಲಿ ನೀವು ಕಟ್ಟುವ ಪ್ರೀಮಿಯಮ್ ಹಣದ ಒಟ್ಟು ಮೊತ್ತ ಕೇವಲ 21,000 ರೂಗಿಂತ ತುಸು ಹೆಚ್ಚು.
5,000 ರೂ ಪಿಂಚಣಿ ಬೇಕೆಂದರೆ ತಿಂಗಳಿಗೆ 210 ರೂ ಅನ್ನು 42 ವರ್ಷ ಹೂಡಿಕೆ ಮಾಡಬೇಕು. ಈ 42 ವರ್ಷದಲ್ಲಿ ನೀವು ಕಟ್ಟುವ ಪ್ರೀಮಿಯಮ್ 1,05,840 ರೂ ಮಾತ್ರ.
ನೀವು ಹೆಚ್ಚು ವಯಸ್ಸಿನಲ್ಲಿ ಸಬ್ಸ್ಕ್ರೈಬ್ ಆದರೆ, ಉದಾಹರಣೆಗೆ, 40ನೇ ವಯಸ್ಸಿನಲ್ಲಿ ಎಪಿವೈ ಸ್ಕೀಮ್ ಪಡೆದರೆ ಹೂಡಿಕೆ ಅವಧಿ 20 ವರ್ಷ ಮಾತ್ರವೇ ಇರುತ್ತದೆ. ನಿಮಗೆ 5,000 ರೂ ಪಿಂಚಣಿ ಗುರಿ ಇದ್ದರೆ ನೀವು ತಿಂಗಳಿಗೆ 1,454 ರೂ ಹಣ ಕಟ್ಟುತ್ತಾ ಹೋಗಬೇಕಾಗುತ್ತದೆ.
ಹೂಡಿಕೆ ಅವಧಿಯಲ್ಲಿ ಮೃತಪಟ್ಟರೆ?
ಎಪಿವೈ ಚಂದಾದಾರರು 60ರ ವಯಸ್ಸು ತಲುಪುವ ಮುನ್ನವೇ ಅಕಸ್ಮಾತ್ ಆಗಿ ಮೃತಪಟ್ಟರೆ, ಆ ಸ್ಕೀಮ್ನ ಹಕ್ಕು ಅವರ ಸಂಗಾತಿಗೆ ಹೋಗುತ್ತದೆ. ಅವರು ಹೂಡಿಕೆ ಮುಂದುವರಿಸಬಹುದು. ಮೃತರ ವಯಸ್ಸು 60 ವರ್ಷ ದಾಟುವವರೆಗೂ ಹೂಡಿಕೆ ಮಾಡಬಹುದು. ಇಲ್ಲದಿದ್ದರೆ ಲಂಪ್ಸಮ್ ಹಣ ಹಿಂಪಡೆಯಬಹುದು. ಹೂಡಿಕೆ ಮುಂದುವರಿಸಿ ನಂತರ ಪಿಂಚಣಿ ಸೌಲಭ್ಯ ಪಡೆಯಬಹುದು
