ಪುಣೆ, 18 ಜೂನ್ 2026: ಇತ್ತೀಚಿನ ದಿನಗಳಲ್ಲಿ ಸೈಬರ್ ವಂಚಕರು ಕೇವಲ ಸಾಮಾನ್ಯ ಜನರನ್ನು ಮಾತ್ರವಲ್ಲದೆ, ದೇಶದ ಅತ್ಯುನ್ನತ ಹಣಕಾಸು ತಜ್ಞರನ್ನೇ ತಮ್ಮ ಜಾಲಕ್ಕೆ ಕೆಡವಿ ಕೋಟ್ಯಂತರ ರೂಪಾಯಿಗಳನ್ನು ಲೂಟಿ ಮಾಡುತ್ತಿದ್ದಾರೆ. ಪುಣೆಯ ಇಬ್ಬರು ಉನ್ನತ ವೃತ್ತಿಪರರು ಇಂತಹ ಸೈಬರ್ ಹಗರಣಕ್ಕೆ ಬಲಿಯಾಗಿದ್ದು, ಅವರಲ್ಲಿ ಒಬ್ಬರು ತೆರಿಗೆ ಸಲಹೆಗಾರರಾಗಿದ್ದರೆ (Tax Advisor), ಮತ್ತೊಬ್ಬರು ಚಾರ್ಟರ್ಡ್ ಅಕೌಂಟೆಂಟ್ (CA) ಆಗಿದ್ದಾರೆ. ಸಾರ್ವಜನಿಕರಿಗೆ ಆರ್ಥಿಕ ನಿರ್ವಹಣೆಯ ಪಾಠ ಹೇಳಿಕೊಡುವ ಈ ಇಬ್ಬರು ತಜ್ಞರಿಂದ ವಂಚಕರು ಒಟ್ಟು 3.87 ಕೋಟಿ ರೂಪಾಯಿಗಳನ್ನು (2.72 ಕೋಟಿ ಮತ್ತು 1.15 ಕೋಟಿ) ಅತ್ಯಂತ ಚಾಣಾಕ್ಷತನದಿಂದ ದೋಚಿರುವ ಆಘಾತಕಾರಿ ಪ್ರಕರಣಗಳು ಬೆಳಕಿಗೆ ಬಂದಿವೆ.

​ಮೊದಲ ಪ್ರಕರಣದಲ್ಲಿ, ಪುಣೆಯ 51 ವರ್ಷದ ತೆರಿಗೆ ಸಲಹೆಗಾರರೊಬ್ಬರು ಟೆಲಿಗ್ರಾಮ್‌ನಲ್ಲಿ ಬಂದ ‘ವರ್ಕ್ ಫ್ರಮ್ ಹೋಮ್’ ಯೋಜನೆಯ ಆಮಿಷಕ್ಕೆ ಬಲಿಯಾಗಿದ್ದಾರೆ. ಆರಂಭದಲ್ಲಿ ಗೂಗಲ್‌ನಲ್ಲಿ ನಕಲಿ ಸಕಾರಾತ್ಮಕ ವಿಮರ್ಶೆಗಳನ್ನು (Positive Reviews) ನೀಡುವ ಕೆಲಸ ಕೊಟ್ಟು, ಅದಕ್ಕೆ ಪ್ರತಿಯಾಗಿ 500 ರೂಪಾಯಿ ಹಣವನ್ನು ಖಾತೆಗೆ ಜಮೆ ಮಾಡಿ ವಂಚಕರು ಇವರ ನಂಬಿಕೆ ಗಳಿಸಿದ್ದರು. ತದನಂತರ ‘ಪ್ರಿಪೇಡ್ ಟಾಸ್ಕ್’ ಹೆಸರಿನಲ್ಲಿ ಹೆಚ್ಚಿನ ಲಾಭದ ಆಸೆ ತೋರಿಸಿ ದೊಡ್ಡ ಮೊತ್ತ ಹೂಡಿಕೆ ಮಾಡಲು ಪ್ರೇರೇಪಿಸಲಾಯಿತು. ಇವರ ಖಾತೆಯಲ್ಲಿ ಲಾಭದ ಮೊತ್ತ ಕಾಣಿಸುತ್ತಿದ್ದರೂ ಅದನ್ನು ಹಿಂಪಡೆಯಲು ಸಾಧ್ಯವಾಗದಂತೆ ಹೊಸ ಶರತ್ತುಗಳನ್ನು ವಿಧಿಸಿ, ಕೇವಲ ಎರಡೇ ತಿಂಗಳಲ್ಲಿ 33 ವಹಿವಾಟುಗಳ ಮೂಲಕ ಒಟ್ಟು 2.72 ಕೋಟಿ ರೂಪಾಯಿಗಳನ್ನು ವಿಭಿನ್ನ ನಕಲಿ (Mule) ಬ್ಯಾಂಕ್ ಖಾತೆಗಳಿಗೆ ವರ್ಗಾಯಿಸಿಕೊಂಡು ವಂಚಿಸಲಾಗಿದೆ.

​ಮತ್ತೊಂದು ಸೈಬರ್ ವಂಚನೆಯ ಪ್ರಕರಣದಲ್ಲಿ, 48 ವರ್ಷದ ಚಾರ್ಟರ್ಡ್ ಅಕೌಂಟೆಂಟ್ ಒಬ್ಬರು ವಾಟ್ಸಾಪ್‌ನಲ್ಲಿ ಶೇರು ಮಾರುಕಟ್ಟೆಯ ಲಾಭದ ಕುರಿತಾದ ಜಾಹೀರಾತನ್ನು ನಂಬಿ ಬರೋಬ್ಬರಿ 1.15 ಕೋಟಿ ರೂಪಾಯಿಗಳನ್ನು ಕಳೆದುಕೊಂಡಿದ್ದಾರೆ. ವಂಚಕರು ಇವರನ್ನು ನಕಲಿ ಶೇರು ತರಬೇತಿ ಗ್ರೂಪ್‌ಗೆ ಸೇರಿಸಿ, ವಿವಿಧ ಐಪಿಓಗಳಲ್ಲಿ (IPO) ಹಣ ಹೂಡುವಂತೆ ನಂಬಿಸಿದ್ದರು. ಕೇವಲ ನಕಲಿ ವೆಬ್‌ಸೈಟ್‌ನ ಸ್ಕ್ರೀನ್ ಮೇಲೆ ಮಾತ್ರ ಇವರಿಗೆ 5 ಕೋಟಿ ರೂಪಾಯಿ ಲಾಭವಾಗಿರುವಂತೆ ಭ್ರಮೆ ಸೃಷ್ಟಿಸಿ, ಆ ಹಣವನ್ನು ವಿತ್‌ಡ್ರಾ ಮಾಡಲು ಮತ್ತಷ್ಟು ಹಣವನ್ನು ಕಡೂಡಿಸಿಕೊಂಡು ಕೊನೆಗೆ ಗ್ರೂಪ್ ಅಡ್ಮಿನ್‌ಗಳು ಸಂಪರ್ಕಕ್ಕೆ ಸಿಗದಂತೆ ಕಣ್ಮರೆಯಾಗಿದ್ದಾರೆ. ತಾವು ಮೋಸ ಹೋಗಿರುವುದನ್ನು ಅರಿತ ಸಿಎ ಅವರು ಸದ್ಯ ರಾಷ್ಟ್ರೀಯ ಸೈಬರ್ ಅಪರಾಧ ವರದಿ ಪೋರ್ಟಲ್‌ನಲ್ಲಿ ದೂರು ದಾಖಲಿಸಿದ್ದಾರೆ.

​ಈ ಎರಡೂ ಪ್ರಕರಣಗಳನ್ನು ಗಮನಿಸಿದಾಗ ಸೈಬರ್ ಅಪರಾಧಿಗಳು ನೇರವಾಗಿ ಹಣ ಅಥವಾ ಓಟಿಪಿ ಕೇಳದೆ, ಜನರ ಮನವೊಲಿಸಿ ಅವರ ಕೈಯಿಂದಲೇ ಹಣ ಹಾಕಿಸುವ ‘ಸಾಮಾಜಿಕ ಇಂಜಿನಿಯರಿಂಗ್’ (Social Engineering) ತಂತ್ರವನ್ನು ಬಳಸುತ್ತಿರುವುದು ಸ್ಪಷ್ಟವಾಗಿದೆ. ಮೊದಲು ಸಣ್ಣ ಲಾಭಗಳನ್ನು ನೀಡಿ ವಿಶ್ವಾಸ ಗಳಿಸುವುದು ಮತ್ತು ನಂತರ ದೊಡ್ಡ ಲಾಭದ ಭರವಸೆ ನೀಡಿ ಬಂಡವಾಳವನ್ನು ಪೂರ್ತಿಯಾಗಿ ಲೂಟಿ ಮಾಡುವುದು ಇವರ ಮುಖ್ಯ ವಿಧಾನವಾಗಿದೆ. ಹಣಕಾಸು ಜಗತ್ತಿನ ತಜ್ಞರೇ ಇಂತಹ ನಕಲಿ ವೇದಿಕೆಗಳ ಭ್ರಮೆಗೆ ಬಿದ್ದು ಕೋಟ್ಯಂತರ ರೂಪಾಯಿ ಕಳೆದುಕೊಂಡಿರುವುದು ತೀವ್ರ ಕಳವಳಕಾರಿಯಾಗಿದ್ದು, ಸಾರ್ವಜನಿಕರು ಅಪರಿಚಿತ ಲಿಂಕ್‌ಗಳು, ವಾಟ್ಸಾಪ್ ಗ್ರೂಪ್‌ಗಳು ಹಾಗೂ ಅತಿಯಾದ ಲಾಭದ ಆಮಿಷಗಳ ಬಗ್ಗೆ ಅತ್ಯಂತ ಜಾಗರೂಕರಾಗಿರಬೇಕು ಎಂದು ಸೈಬರ್ ಪೋಲಿಸರು ಎಚ್ಚರಿಕೆ ನೀಡಿದ್ದಾರೆ.