ಗಾಂಧಿನಗರ, ಸೆಪ್ಟೆಂಬರ್ 12 : ಗುಜರಾತ್ನ ಗ್ರಾಮೀಣ ಪ್ರದೇಶಗಳಲ್ಲಿ ಕುಡಿಯುವ ನೀರಿನ ಗುಣಮಟ್ಟದ ಕುರಿತು ಆತಂಕಕಾರಿ ಸಂಗತಿ ಬಹಿರಂಗವಾಗಿದೆ. ಗುಜರಾತ್ ವಿಧಾನಸಭೆಯಲ್ಲಿ ಶುಕ್ರವಾರ ಮಂಡಿಸಲಾದ ಭಾರತದ ಮಹಾಲೇಖಪಾಲರ (CAG) ವರದಿಯ ಪ್ರಕಾರ, ಪರಿಶೀಲಿಸಲಾದ ಹಳ್ಳಿಗಳಲ್ಲಿನ ನೀರಿನ ಮಾದರಿಗಳ ಪೈಕಿ ಶೇ.89ರಷ್ಟು ಮಾದರಿಗಳು ಕುಡಿಯಲು ಯೋಗ್ಯವಾಗಿಲ್ಲ. 2019-20ರಿಂದ 2023-24ರವರೆಗೆ ಜಲ ಜೀವನ್ ಮಿಷನ್ ಅನುಷ್ಠಾನದ ಕುರಿತು ನಡೆಸಿದ ಲೆಕ್ಕಪರಿಶೋಧನೆಯಲ್ಲಿ ಈ ಅಂಶ ಬೆಳಕಿಗೆ ಬಂದಿದೆ.
CAG ವರದಿಯ ಪ್ರಕಾರ, 48 ಹಳ್ಳಿಗಳಿಂದ ಒಟ್ಟು 88 ನೀರಿನ ಮಾದರಿಗಳನ್ನು ಸಂಗ್ರಹಿಸಿ ಪರೀಕ್ಷಿಸಲಾಗಿತ್ತು. ಈ ಪೈಕಿ ಕೇವಲ 10 ಮಾದರಿಗಳು, ಅಂದರೆ ಶೇ.11.36ರಷ್ಟು ಮಾತ್ರ ನಿಗದಿತ ಮಾನದಂಡಗಳಿಗೆ ಅನುಗುಣವಾಗಿ ಕುಡಿಯಲು ಯೋಗ್ಯವಾಗಿದ್ದವು. ಉಳಿದ 78 ಮಾದರಿಗಳು, ಅಂದರೆ ಶೇ.88.64ರಷ್ಟು ನೀರಿನ ಮಾದರಿಗಳು ಅಸುರಕ್ಷಿತವಾಗಿದ್ದವು. ಅಮ್ರೇಲಿ, ಆನಂದ್, ಭರೂಚ್, ದಾಹೋದ್, ಗಾಂಧಿನಗರ ಮತ್ತು ಪಠಾಣ್ ಜಿಲ್ಲೆಗಳಲ್ಲಿ ಈ ಪರೀಕ್ಷೆಗಳನ್ನು ನಡೆಸಲಾಗಿತ್ತು.
ನೀರಿನ ಗುಣಮಟ್ಟದ ವಿಶ್ಲೇಷಣೆಯಲ್ಲಿ ಹಲವು ಅಂಶಗಳು ನಿಗದಿತ ಮಿತಿಗಿಂತ ಹೆಚ್ಚಾಗಿರುವುದು ಕಂಡುಬಂದಿದೆ. ಪರೀಕ್ಷಿಸಲಾದ ಮಾದರಿಗಳಲ್ಲಿ ಶೇ.65ರಷ್ಟು ಮಾದರಿಗಳಲ್ಲಿ ನೀರಿನ ಗಡಸುತನ, ಶೇ.63ರಲ್ಲಿ ಕಲಕಲು ಅಥವಾ ಪ್ರಕ್ಷುಬ್ಧತೆ, ಶೇ.56ರಲ್ಲಿ ಒಟ್ಟು ಕರಗಿದ ಘನವಸ್ತುಗಳು (TDS) ಮತ್ತು ಕ್ಷಾರತೆ ಹಾಗೂ ಶೇ.50ರಷ್ಟು ಮಾದರಿಗಳಲ್ಲಿ ಮೆಗ್ನೀಶಿಯಮ್ ಪ್ರಮಾಣ ನಿಗದಿತ ಮಿತಿಗಿಂತ ಹೆಚ್ಚಾಗಿತ್ತು. ಇದು ಗ್ರಾಮೀಣ ಜನರ ಆರೋಗ್ಯದ ದೃಷ್ಟಿಯಿಂದ ಗಂಭೀರ ಕಳವಳಕ್ಕೆ ಕಾರಣವಾಗಿದೆ.
ಇದರ ಜೊತೆಗೆ, ಜಲ ಜೀವನ್ ಮಿಷನ್ ಅಡಿಯಲ್ಲಿ ರಚಿಸಲಾದ ‘ಪಾನಿ ಸಮಿತಿ’ಗಳಲ್ಲೂ ನಿಯಮಗಳ ಉಲ್ಲಂಘನೆ ಕಂಡುಬಂದಿದೆ. ಪರಿಶೀಲಿಸಲಾದ ಒಂಬತ್ತು ಸಮಿತಿಗಳಲ್ಲಿ ಮಹಿಳಾ ಪ್ರಾತಿನಿಧ್ಯ ನಿಗದಿತ ಪ್ರಮಾಣಕ್ಕಿಂತ ಕಡಿಮೆಯಾಗಿದ್ದು, ಐದು ಸಮಿತಿಗಳಲ್ಲಿ ಒಬ್ಬ ಮಹಿಳಾ ಸದಸ್ಯರೂ ಇರಲಿಲ್ಲ. 12 ಸಮಿತಿಗಳಲ್ಲಿ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ ಸದಸ್ಯರಿಗೆ ಕಡ್ಡಾಯ ಪ್ರಾತಿನಿಧ್ಯವೂ ಇರಲಿಲ್ಲ ಎಂದು CAG ವರದಿ ತಿಳಿಸಿದೆ. ಮುಂದಿನ ದಿನಗಳಲ್ಲಿ ಜಲ ಜೀವನ್ ಮಿಷನ್ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದಾಗಿ ರಾಜ್ಯ ಸರ್ಕಾರ ಸ್ಪಷ್ಟಪಡಿಸಿದೆ.
