ಕಠ್ಮಂಡು, ಆ.27: ನೇಪಾಳ–ಟಿಬೆಟ್ ಗಡಿಭಾಗದಲ್ಲಿ ಸಂಭವಿಸಿದ ಭೀಕರ ದಿಢೀರ್ ಪ್ರವಾಹ ಹಾಗೂ ಭೂಕುಸಿತದಿಂದ ಭಾರೀ ಅನಾಹುತ ಸಂಭವಿಸಿದ್ದು, ಕನಿಷ್ಠ 160 ಮಂದಿ ಮೃತಪಟ್ಟಿದ್ದಾರೆ. ನೇಪಾಳ ಮತ್ತು ಟಿಬೆಟ್ನಾದ್ಯಂತ ಸುಮಾರು 1,500 ಮಂದಿ ನಾಪತ್ತೆಯಾಗಿದ್ದಾರೆ. ನೇಪಾಳದಲ್ಲಿ 826 ಮಂದಿ ಕಾಣೆಯಾಗಿದ್ದು, ಅವರಲ್ಲಿ ಸುಮಾರು 600 ಮಂದಿ ವಿದೇಶಿ ಪ್ರವಾಸಿಗರು ಎನ್ನಲಾಗಿದೆ. ಟಿಬೆಟ್ನ ಗೈರಾಂಗ್ ಪ್ರದೇಶದಲ್ಲೂ 558 ಮಂದಿ ನಾಪತ್ತೆಯಾಗಿದ್ದಾರೆ ಎಂದು ವರದಿಯಾಗಿದೆ.
ಬುಧವಾರ ಬೆಳಗ್ಗೆ ಸುಮಾರು 8:40ರ ವೇಳೆಗೆ ಪರ್ವತ ಪ್ರದೇಶದಲ್ಲಿ ದಿಢೀರ್ ಪ್ರವಾಹ ಮತ್ತು ಭೂಕುಸಿತ ಸಂಭವಿಸಿದೆ. ಲೆಂಡೆ ಖೋಲಾ ನದಿ ಕಣಿವೆಯಲ್ಲಿ ನೀರು, ಕೆಸರು ಹಾಗೂ ಬೃಹತ್ ಬಂಡೆಗಳು ರಭಸವಾಗಿ ಹರಿದು ಗ್ರಾಮಗಳು, ಮನೆಗಳು ಮತ್ತು ಮೂಲಸೌಕರ್ಯಗಳನ್ನು ಕೊಚ್ಚಿಕೊಂಡು ಹೋಗಿವೆ. ಕನಿಷ್ಠ 19 ಸೇತುವೆಗಳು ಹಾಗೂ ಸುಮಾರು 40 ಕಿಲೋಮೀಟರ್ ರಸ್ತೆ ಹಾನಿಗೀಡಾಗಿವೆ. ತ್ರಿಶೂಲಿ ನದಿಯ ನೀರಿನ ಮಟ್ಟವೂ ಕೇವಲ 30 ನಿಮಿಷಗಳಲ್ಲಿ ಸುಮಾರು 9 ಮೀಟರ್ ಏರಿಕೆಯಾಗಿದೆ.
ಈ ದುರಂತಕ್ಕೆ ಆರಂಭದಲ್ಲಿ ಭೂಕಂಪ ಕಾರಣವಾಗಿರಬಹುದು ಎಂದು ಶಂಕಿಸಲಾಗಿತ್ತು. ಆದರೆ ಬಳಿಕದ ಅಧ್ಯಯನಗಳು ಹಿಮಾಲಯದ ಸುಮಾರು 5,200 ಮೀಟರ್ ಎತ್ತರದಲ್ಲಿದ್ದ ಹಿಮನದಿಯ ಭಾಗ ಕುಸಿದು, ಆಳವಾದ ಕಣಿವೆಗೆ ಬಿದ್ದ ಪರಿಣಾಮ ಭಾರೀ ಪ್ರಮಾಣದ ನೀರು, ಕಲ್ಲು ಮತ್ತು ಕೆಸರು ಕೆಳಭಾಗಕ್ಕೆ ಹರಿದುಬಂದಿರುವುದನ್ನು ಸೂಚಿಸಿವೆ. ಇದರಿಂದ ನೈಸರ್ಗಿಕ ತಡೆ ಒಡೆದು ದಿಢೀರ್ ಪ್ರವಾಹ ಉಂಟಾಗಿದೆ. ಅಮೆರಿಕದ ಭೂವೈಜ್ಞಾನಿಕ ಸಮೀಕ್ಷೆಯೂ ಭೂಕಂಪವಲ್ಲ, ಭೂಕುಸಿತದಿಂದ ಉಂಟಾದ ಕಂಪನವೇ ದಾಖಲಾಗಿತ್ತು ಎಂದು ಸ್ಪಷ್ಟಪಡಿಸಿದೆ.
ಪ್ರವಾಹದ ನಂತರ ನೇಪಾಳದ ಸೇನೆ ಹಾಗೂ ರಕ್ಷಣಾ ತಂಡಗಳು ಹೆಲಿಕಾಪ್ಟರ್, ಡ್ರೋನ್ ಮತ್ತು ಶ್ವಾನಗಳ ನೆರವಿನಿಂದ ಶೋಧ ಹಾಗೂ ರಕ್ಷಣಾ ಕಾರ್ಯಾಚರಣೆ ಆರಂಭಿಸಿವೆ. ಆದರೆ ರಸ್ತೆಗಳು ಕೊಚ್ಚಿಹೋಗಿರುವುದು, ನದಿಯ ನೀರಿನ ರಭಸ ಮತ್ತು ಭಾರೀ ಪ್ರಮಾಣದ ಕೆಸರು ರಕ್ಷಣಾ ಕಾರ್ಯಕ್ಕೆ ಅಡ್ಡಿಯಾಗಿವೆ. ವೇಗವಾಗಿ ಬಿಸಿಯಾಗುತ್ತಿರುವ ಹಿಮಾಲಯದಲ್ಲಿ ಹಿಮನದಿಗಳ ಅಸ್ಥಿರತೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇಂತಹ ದಿಢೀರ್ ಪ್ರವಾಹಗಳ ಅಪಾಯವೂ ಹೆಚ್ಚುತ್ತಿದೆ ಎಂಬ ಆತಂಕ ಇದೀಗ ಮತ್ತಷ್ಟು ಗಂಭೀರವಾಗಿದೆ.
