ನವದೆಹಲಿ, ಜುಲೈ 11 2026 : ದೇಶದ ಕೋಟ್ಯಂತರ ರೋಗಿಗಳಿಗೆ ಕೇಂದ್ರ ಸರ್ಕಾರ ಮಹತ್ವದ ಪರಿಹಾರ ನೀಡಿದ್ದು, ಅಧಿಕ ರಕ್ತದೊತ್ತಡ (ಬಿಪಿ), ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆಗಳು ಸೇರಿದಂತೆ ವಿವಿಧ ಗಂಭೀರ ಆರೋಗ್ಯ ಸಮಸ್ಯೆಗಳ ಚಿಕಿತ್ಸೆಗೆ ಬಳಸುವ 39 ಅಗತ್ಯ ಔಷಧಿಗಳ ಚಿಲ್ಲರೆ ಬೆಲೆಯನ್ನು ರಾಷ್ಟ್ರೀಯ ಔಷಧ ದರ ನಿಯಂತ್ರಣ ಪ್ರಾಧಿಕಾರ (NPPA) ನಿಗದಿಪಡಿಸಿದೆ. ಈ ಕ್ರಮದಿಂದ ದೀರ್ಘಕಾಲದ ಚಿಕಿತ್ಸೆಗೆ ಅವಲಂಬಿತರಾಗಿರುವ ಲಕ್ಷಾಂತರ ರೋಗಿಗಳ ಔಷಧ ವೆಚ್ಚ ಕಡಿಮೆಯಾಗುವ ನಿರೀಕ್ಷೆಯಿದೆ.

ಹೊಸ ದರ ನಿಗದಿಯು ಡ್ರಗ್ಸ್ (ಪ್ರೈಸ್ ಕಂಟ್ರೋಲ್) ಆದೇಶ–2013ರ ಅನ್ವಯ ಜಾರಿಗೊಂಡಿದ್ದು, ಬಿಪಿ, ಮಧುಮೇಹ, ಹೃದಯ ಕಾಯಿಲೆಗಳು, ಸೋಂಕುಗಳು, ಕ್ಯಾನ್ಸರ್, ಕಣ್ಣಿನ ಕಾಯಿಲೆಗಳು, ಎಚ್‌ಐವಿ ಸೇರಿದಂತೆ ಹಲವು ರೋಗಗಳ ಚಿಕಿತ್ಸೆಗೆ ಬಳಸುವ ಔಷಧಿಗಳು ಇದರ ವ್ಯಾಪ್ತಿಗೆ ಬಂದಿವೆ. ದೀರ್ಘಾವಧಿಯ ಚಿಕಿತ್ಸೆಗೆ ಹೆಚ್ಚಿನ ಹಣ ಖರ್ಚು ಮಾಡಬೇಕಾಗಿದ್ದ ರೋಗಿಗಳಿಗೆ ಈ ಕ್ರಮವು ಗಮನಾರ್ಹ ಆರ್ಥಿಕ ನೆರವಾಗಲಿದೆ.

ಎನ್‌ಪಿಪಿಎ ದರ ನಿಯಂತ್ರಣದ ಉದ್ದೇಶ ಅಗತ್ಯ ಔಷಧಿಗಳನ್ನು ಸಾಮಾನ್ಯ ಜನರಿಗೆ ಕೈಗೆಟುಕುವ ದರದಲ್ಲಿ ಲಭ್ಯವಾಗುವಂತೆ ಮಾಡುವುದು. ಹೊಸ ದರದ ಔಷಧಿಗಳು ಶೀಘ್ರದಲ್ಲೇ ದೇಶದ ಔಷಧ ಮಳಿಗೆಗಳಲ್ಲಿ ಲಭ್ಯವಾಗಲಿದ್ದು, ರೋಗಿಗಳ ಚಿಕಿತ್ಸಾ ವೆಚ್ಚದಲ್ಲಿ ಇಳಿಕೆಯಾಗುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.