ಮಂಗಳೂರು, ಸೆಪ್ಟೆಂಬರ್ 17 :
ಖ್ಯಾತ ತುಳು ಹಾಸ್ಯ ನಟ ಅರವಿಂದ್ ಬೋಳಾರ್ ಅವರು ಖಾಸಗಿ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿರುವ ವಿಡಿಯೋ ತುಣುಕೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಇದೀಗ ಅವರ ಹೇಳಿಕೆಯನ್ನು ಮುಂದಿಟ್ಟುಕೊಂಡು ಕೆಲ ಬಲಪಂಥೀಯ ವಲಯಗಳಿಂದ ತೀವ್ರ ಆಕ್ಷೇಪ ವ್ಯಕ್ತವಾಗುತ್ತಿದೆ. ತಮ್ಮ ಸಿನಿಮಾಗಳನ್ನು ಹಾಗೂ ಹಾಸ್ಯವನ್ನು ಮುಸ್ಲಿಂ ಸಮುದಾಯದವರು ಹೆಚ್ಚಿನ ರೀತಿಯಲ್ಲಿ ಇಷ್ಟಪಟ್ಟಿದ್ದಾರೆ ಎಂದು ಹೇಳಿರುವ ಬೋಳಾರ್ ಅವರ ಮಾತು, ಮೂಲತಃ ತಮ್ಮ ಅಭಿಮಾನಿಗಳ ಪ್ರೀತಿ ಮತ್ತು ಬೆಂಬಲದ ಕುರಿತು ವ್ಯಕ್ತಪಡಿಸಿದ ಅಭಿಪ್ರಾಯವಾಗಿದ್ದರೂ, ಅದಕ್ಕೆ ಸಮುದಾಯದ ಓಲೈಕೆಯ ಬಣ್ಣ ನೀಡಲಾಗುತ್ತಿದೆ ಎಂಬ ಚರ್ಚೆ ನಡೆಯುತ್ತಿದೆ.
ವಿಶೇಷವಾಗಿ ಗಮನಿಸಬೇಕಾದ ಅಂಶವೆಂದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಕೆಲವರು ಪ್ರಚಾರ ಮಾಡುತ್ತಿರುವ ರೀತಿಯಲ್ಲಿ “ನನಗೆ ಮುಸ್ಲಿಮರೇ ಮೊದಲು” ಎಂಬ ನೇರ ವಾಕ್ಯವನ್ನು ಬೋಳಾರ್ ಅವರು ಹೇಳಿರುವುದು ವೈರಲ್ ಆಗಿರುವ ತುಣುಕಿನಲ್ಲಿ ಕಂಡುಬರುವುದಿಲ್ಲ. ಬದಲಾಗಿ, ತಮ್ಮನ್ನು ಹೆಚ್ಚು ಇಷ್ಟಪಟ್ಟವರು ಮುಸ್ಲಿಮರು ಹಾಗೂ ತಮ್ಮ ಸಿನಿಮಾಗಳಲ್ಲಿ ಮುಸ್ಲಿಂ ಪಾತ್ರಗಳನ್ನು ನಿರ್ವಹಿಸಿರುವುದರ ಕುರಿತು ಅವರು ಮಾತನಾಡಿರುವುದು ಕಂಡುಬರುತ್ತದೆ. ಈ ಮಾತುಗಳನ್ನು ಅದರ ಪೂರ್ಣ ಸಂದರ್ಭದಿಂದ ಬೇರ್ಪಡಿಸಿ ಸಮುದಾಯಗಳ ನಡುವಿನ ಸಂಘರ್ಷದ ವಿಚಾರವನ್ನಾಗಿ ಮಾಡುವುದು ಎಷ್ಟು ಸಮಂಜಸ ಎಂಬ ಪ್ರಶ್ನೆಯೂ ಇದೀಗ ಎದುರಾಗಿದೆ.
ಕಲಾವಿದನೊಬ್ಬ ತನ್ನನ್ನು ಪ್ರೀತಿಸಿದ ನಿರ್ದಿಷ್ಟ ಸಮುದಾಯದ ಪ್ರೇಕ್ಷಕರಿಗೆ ಕೃತಜ್ಞತೆ ವ್ಯಕ್ತಪಡಿಸುವುದನ್ನೇ ವಿವಾದವನ್ನಾಗಿ ಮಾಡುವ ಪ್ರವೃತ್ತಿಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿವೆ. ತುಳು ಚಿತ್ರರಂಗ ಮತ್ತು ಕರಾವಳಿಯ ಸಾಂಸ್ಕೃತಿಕ ಬದುಕಿನಲ್ಲಿ ವಿವಿಧ ಧರ್ಮಗಳ ಜನರು ದಶಕಗಳಿಂದಲೂ ಭಾಗಿಯಾಗಿದ್ದಾರೆ. ಇಂತಹ ಬಹುಸಾಂಸ್ಕೃತಿಕ ವಾತಾವರಣದಲ್ಲಿ ಒಬ್ಬ ಕಲಾವಿದನ ಮಾತನ್ನು ಸಂಭಾಷಣೆ ಮತ್ತು ಸೌಹಾರ್ದದ ದೃಷ್ಟಿಯಿಂದ ನೋಡುವ ಬದಲು, ತಕ್ಷಣವೇ ‘ಓಲೈಕೆ’ ಅಥವಾ ‘ವಿರೋಧ’ದ ರಾಜಕೀಯ ಕನ್ನಡಕದಲ್ಲಿ ನೋಡುವುದು ಸಮಾಜದಲ್ಲಿ ಅನಗತ್ಯ ವಿಭಜನೆಗೆ ಕಾರಣವಾಗಬಹುದು ಎಂಬ ಅಭಿಪ್ರಾಯವೂ ಕೇಳಿಬರುತ್ತಿದೆ.
ವಿವಾದದ ನಡುವೆ ಬೋಳಾರ್ ಅವರಿಗೆ ಅಭಿಮಾನಿಯೊಬ್ಬರು ಕರೆ ಮಾಡಿ ಅವರ ಹೇಳಿಕೆಯ ಕುರಿತು ಪ್ರಶ್ನಿಸಿರುವ ಆಡಿಯೋ ಕೂಡ ಹರಿದಾಡುತ್ತಿದೆ. ಆದರೆ ಈ ಘಟನೆಗೆ ಸಂಬಂಧಿಸಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿರುವ ಚರ್ಚೆ, ಒಬ್ಬ ಕಲಾವಿದನ ಮಾತಿನ ಮೀರಿದ ಸಮುದಾಯ ರಾಜಕೀಯದ ಚರ್ಚೆಯಾಗಿ ರೂಪುಗೊಳ್ಳುತ್ತಿದೆ. ಯಾವುದೇ ಹೇಳಿಕೆಯನ್ನು ಅದರ ಪೂರ್ಣ ಸಂದರ್ಭದೊಂದಿಗೆ ಪರಿಶೀಲಿಸುವ ಬದಲು ಆಯ್ದ ತುಣುಕುಗಳ ಆಧಾರದಲ್ಲಿ ಆರೋಪ-ಪ್ರತ್ಯಾರೋಪ ನಡೆಸುವುದಕ್ಕಿಂತ, ಕರಾವಳಿಯ ಸೌಹಾರ್ದ ಪರಂಪರೆಯನ್ನು ಉಳಿಸಿಕೊಂಡು ಭಿನ್ನಾಭಿಪ್ರಾಯಗಳನ್ನು ಆರೋಗ್ಯಕರವಾಗಿ ಚರ್ಚಿಸುವ ಅಗತ್ಯವಿದೆ ಎಂಬ ಅಭಿಪ್ರಾಯಗಳು ಇದೀಗ ವ್ಯಕ್ತವಾಗುತ್ತಿವೆ.
