ಹೊಸದಿಲ್ಲಿ, ಆ.21: ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಲ್ಲಿ ‘ಗ್ರೀನ್ ಎಐ’ ಡೇಟಾ ಸೆಂಟರ್ ಅಭಿವೃದ್ಧಿಪಡಿಸುವ ಉದ್ದೇಶದಿಂದ ಖಾಸಗಿ ಸಂಸ್ಥೆಗಳಿಂದ ಪ್ರಸ್ತಾವಗಳನ್ನು ಆಹ್ವಾನಿಸಿದ್ದ ಆಡಳಿತವು ಇದೀಗ ಆ ಕರೆಯನ್ನು ಹಿಂಪಡೆದಿದೆ. ಆ.10ರಂದು ಹೊರಡಿಸಿದ್ದ ಪ್ರಸ್ತಾವ ಆಹ್ವಾನವನ್ನು ಆಡಳಿತಾತ್ಮಕ ಕಾರಣಗಳನ್ನು ಉಲ್ಲೇಖಿಸಿ ಹಿಂಪಡೆಯಲಾಗಿದೆ ಎಂದು ಮಾಹಿತಿ ತಂತ್ರಜ್ಞಾನ ಕಾರ್ಯದರ್ಶಿಗಳ ಕಚೇರಿ ಆ.14ರಂದು ತಿಳಿಸಿದೆ.
ಗ್ರೇಟ್ ನಿಕೋಬಾರ್ ಅಥವಾ ಲಿಟಲ್ ಅಂಡಮಾನ್ನಲ್ಲಿ ‘ಗ್ರೀನ್ ಎಐ’ ಅಥವಾ ಡೇಟಾ ಸೆಂಟರ್ ಸ್ಥಾಪಿಸುವ ಸಾಧ್ಯತೆಗಳನ್ನು ಪರಿಶೀಲಿಸುವುದು ಈ ಪ್ರಸ್ತಾವದ ಉದ್ದೇಶವಾಗಿತ್ತು. ಹೈಪರ್ಸ್ಕೇಲ್ ಮತ್ತು ಎಐ ಆಧಾರಿತ ಡೇಟಾ ಸೆಂಟರ್ಗಳು, ಉನ್ನತ ಸಾಮರ್ಥ್ಯದ ಕಂಪ್ಯೂಟಿಂಗ್ ವ್ಯವಸ್ಥೆಗಳು, ಕ್ಲೌಡ್ ಕಂಪ್ಯೂಟಿಂಗ್, ನವೀಕರಿಸಬಹುದಾದ ಇಂಧನ ಆಧಾರಿತ ಕಾರ್ಯಾಚರಣೆ ಹಾಗೂ ಸಮುದ್ರದ ನೀರನ್ನು ಬಳಸುವ ನವೀನ ತಂಪಾಗಿಸುವ ವ್ಯವಸ್ಥೆಗಳಂತಹ ಯೋಜನೆಗಳನ್ನು ಪರಿಗಣಿಸಲಾಗಿತ್ತು.
ಆದರೆ ಪ್ರಸ್ತಾವ ಆಹ್ವಾನವನ್ನು ಹಿಂಪಡೆಯಲು ಕಾರಣವಾದ ‘ಆಡಳಿತಾತ್ಮಕ ಕಾರಣಗಳು’ ಯಾವುವು ಎಂಬುದನ್ನು ಅಧಿಕಾರಿಗಳು ಸ್ಪಷ್ಟಪಡಿಸಿಲ್ಲ. ಏತನ್ಮಧ್ಯೆ, ಅಂಡಮಾನ್ನಲ್ಲಿ ಈಗಾಗಲೇ ಸುಮಾರು 92,000 ಕೋಟಿ ರೂ. ವೆಚ್ಚದ ಗ್ರೀನ್ಫೀಲ್ಡ್ ವಿಮಾನ ನಿಲ್ದಾಣ, ಅಂತರರಾಷ್ಟ್ರೀಯ ಟ್ರಾನ್ಸ್ಶಿಪ್ಮೆಂಟ್ ಕಂಟೈನರ್ ಟರ್ಮಿನಲ್, ವಿದ್ಯುತ್ ಸ್ಥಾವರ, ಟೌನ್ಶಿಪ್ ಮತ್ತು ಪ್ರವಾಸೋದ್ಯಮ ಸೌಲಭ್ಯಗಳಂತಹ ಹಲವು ಮೂಲಸೌಕರ್ಯ ಯೋಜನೆಗಳು ಅನುಷ್ಠಾನದಲ್ಲಿವೆ.
ಈ ಯೋಜನೆಗಳು ಪರಿಸರ ಅನುಮತಿ ಹಾಗೂ ಸ್ಥಳೀಯ ವಿರೋಧದ ವಿಚಾರದಲ್ಲಿ ಟೀಕೆಗೆ ಗುರಿಯಾಗಿವೆ. ಸಂಬಂಧಿತ ಎರಡು ಪ್ರಕರಣಗಳ ವಿಚಾರಣೆ ಕಲ್ಕತ್ತಾ ಉಚ್ಚ ನ್ಯಾಯಾಲಯದಲ್ಲಿ ಮುಂದುವರಿದಿರುವ ಹಿನ್ನೆಲೆಯಲ್ಲಿ, ಹೊಸ ಎಐ ಡೇಟಾ ಸೆಂಟರ್ ಪ್ರಸ್ತಾವ ಹಿಂಪಡೆಯುವ ಬೆಳವಣಿಗೆ ಗಮನ ಸೆಳೆದಿದೆ.
