ಅಲಬಾಮಾ, ಜೂನ್ 11: ಫಿಫಾ ವಿಶ್ವಕಪ್ ಫುಟ್ಬಾಲ್ ಟೂರ್ನಿಯು ಆರಂಭದಲ್ಲೇ ಮತ್ತೊಂದು ದೊಡ್ಡ ವಿವಾದಕ್ಕೆ ಗುರಿಯಾಗಿದೆ. ಜಗತ್ತಿನ ಖ್ಯಾತ ಫುಟ್ಬಾಲ್ ತಾರೆ ಲಿಯೊನೆಲ್ ಮೆಸ್ಸಿ ಹಾಗೂ ಅವರ ಅರ್ಜೆಂಟೀನಾ ತಂಡದ ಸಹ ಆಟಗಾರರ ವೈಯಕ್ತಿಕ ಪಾಸ್ಪೋರ್ಟ್ ಮಾಹಿತಿಗಳು ಸಾರ್ವಜನಿಕವಾಗಿ ಸೋರಿಕೆಯಾಗಿದ್ದು, ಕ್ರೀಡಾ ಜಗತ್ತಿನಲ್ಲಿ ತೀವ್ರ ಆತಂಕ ಹಾಗೂ ಚರ್ಚೆಗೆ ಕಾರಣವಾಗಿದೆ. ಭದ್ರತಾ ಪ್ರಮಾದದಿಂದಾಗಿ ಈ ಘಟನೆ ಸಂಭವಿಸಿದೆ ಎಂದು ಅಂತರರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ಅಲಬಾಮಾದ ಜೋರ್ಡನ್-ಹೇರ್ ಸ್ಟೇಡಿಯಂನಲ್ಲಿ ಐಸ್ಲೆಂಡ್ ವಿರುದ್ಧ ನಡೆದ ವಿಶ್ವಕಪ್ ಅಭ್ಯಾಸ ಪಂದ್ಯದ ವೇಳೆ ಅರ್ಜೆಂಟೀನಾ ತಂಡದ ಎಲ್ಲ ಆಟಗಾರರ ಪಾಸ್ಪೋರ್ಟ್ ವಿವರಗಳು ಬಹಿರಂಗಗೊಂಡಿವೆ. ಅಧಿಕೃತ ಟೀಮ್ಶೀಟ್ನಲ್ಲಿ ಆಟಗಾರರ ಪಾಸ್ಪೋರ್ಟ್ ಸಂಖ್ಯೆಗಳನ್ನು ಪಟ್ಟಿ ಮಾಡಲಾಗಿತ್ತು. ನಿಯಮಗಳ ಪ್ರಕಾರ, ಈ ಮಾಹಿತಿಯನ್ನು ಮಾಧ್ಯಮಗಳಿಗೆ ಮತ್ತು ಸಾರ್ವಜನಿಕರಿಗೆ ಬಿಡುಗಡೆ ಮಾಡುವ ಮುನ್ನ ಮರೆಮಾಚಬೇಕಿತ್ತು (ಮಬ್ಬುಗೊಳಿಸಬೇಕಿತ್ತು). ಆದರೆ, ಯಾವುದೇ ಸುರಕ್ಷತಾ ಕ್ರಮ ಕೈಗೊಳ್ಳದೆ ಇದನ್ನು ಹಾಗೆಯೇ ಪ್ರಕಟಿಸಲಾಗಿದೆ.
ಈ ಭದ್ರತಾ ಲೋಪವು ಅರ್ಜೆಂಟೀನಾ ತಂಡದ ಆಟಗಾರರನ್ನು ಮಾತ್ರ ಬಾಧಿಸಿದ್ದು, ಎದುರಾಳಿ ಐಸ್ಲೆಂಡ್ ತಂಡದ ಆಟಗಾರರು ಟೀಮ್ಶೀಟ್ಗೆ ತಮ್ಮ ಪಾಸ್ಪೋರ್ಟ್ ಸಂಖ್ಯೆಗಳನ್ನು ಸಲ್ಲಿಸಿರಲಿಲ್ಲ ಎಂದು ತಿಳಿದುಬಂದಿದೆ. ಈ ಗಂಭೀರ ಲೋಪದ ಕುರಿತಾಗಿ ರಾಯ್ಟರ್ಸ್ ಸುದ್ದಿ ಸಂಸ್ಥೆಯು ಅರ್ಜೆಂಟೀನಾ ಫುಟ್ಬಾಲ್ ಫೆಡರೇಷನ್ ಮತ್ತು ಜಾಗತಿಕ ಫುಟ್ಬಾಲ್ ನಿಯಂತ್ರಣ ಮಂಡಳಿಯಾದ ಫಿಫಾದ (FIFA) ಅಧಿಕೃತ ಪ್ರತಿಕ್ರಿಯೆಯನ್ನು ಕೋರಿದೆ.
ಪ್ರಸಕ್ತ ಫಿಫಾ ಟೂರ್ನಿಯಲ್ಲಿ ಉದ್ಭವಿಸಿರುವ ಮೊದಲ ವಿವಾದ ಇದಲ್ಲ. ಇದಕ್ಕೂ ಮುನ್ನ ಅಮೆರಿಕದ ವಿಮಾನ ನಿಲ್ದಾಣದಲ್ಲಿ ಸೆನೆಗಲ್ ತಂಡದ ಆಟಗಾರರನ್ನು ತೀವ್ರ ಭದ್ರತಾ ತಪಾಸಣೆಗೆ ಒಳಪಡಿಸಿದ ವಿಡಿಯೊ ಒಂದು ಜಾಲತಾಣಗಳಲ್ಲಿ ವೈರಲ್ ಆಗಿ ದೊಡ್ಡ ವಿವಾದ ಸೃಷ್ಟಿಸಿತ್ತು. ಸ್ಯಾಡಿಯೊ ಮಾನೆ ಮತ್ತು ಕಲಿಡು ಕುಲಿಬಲಿಯಂಥ ದಿಗ್ಗಜ ಆಟಗಾರರಿದ್ದ ತಂಡವನ್ನು ಅತಿಯಾದ ತಪಾಸಣೆಗೆ ಒಳಪಡಿಸಿ, ಸ್ಪೇನ್ನಂತಹ ಇತರ ಪ್ರಮುಖ ತಂಡಗಳಿಗೆ ಇಂತಹ ತಪಾಸಣೆ ನಡೆಸದಿರುವುದನ್ನು ಜಾಲತಾಣ ಬಳಕೆದಾರರು ತೀವ್ರವಾಗಿ ಆಕ್ಷೇಪಿಸಿದ್ದರು. ಇದರ ಬೆನ್ನಲ್ಲೇ ಈಗ ಮೆಸ್ಸಿ ತಂಡದ ಪಾಸ್ಪೋರ್ಟ್ ಸೋರಿಕೆ ಪ್ರಕರಣವು ಫಿಫಾ ಆಯೋಜಕರಿಗೆ ತಲೆನೋವಾಗಿ ಪರಿಣಮಿಸಿದೆ.
